ပညာသေ မှ ပညာရှင်သို့

          fb ပေါ်ကနေ လူပေါင်းစုံဟာ ရည်ရွယ်ချက်မျိုးစုံနဲ့ ပို့စ် တွေ ရေးကြတင်ကြ လုပ်နေကြတာ ခေတ်ရဲ့ ပေါ်လစီလို ဖြစ်နေပါပြီ ။ 

          ဒီထဲမှာ ကျနော်တို့လို လိုင်းပေါင်းစုံရေးနေတဲ့သူတွေလည်း ရှိတာပါပဲ ။ ကဏ္ဍပေါင်းစုံကို ရေးကြရာမှာ အမှန်တကယ်ထဲထဲဝင်ဝင် နှိုက်နှိုက်ချွတ်ချွတ် သိနိုင်ဖို့ဆိုတာ အင်မတန်ခဲယဥ်းလှပါတယ် ။ 

        ကျနော် ဟိုတုန်းက ရေးခဲ့ဖူးပါတယ် ။ ကျနော်ရေးနေတာ သိလွန်း တတ်လွန်း လို့ ရေးနေတာ မဟုတ်ပါဘူး ။ ရေးစရာကဏ္ဍအတွက် fb ပေါ်ကနေ ဆိုင်ရာ ဆိုင်ရာ အကြောင်းအရာ သတင်းအချက်အလက်လေးတွေ စုဆောင်းပြီး တင်ပြနေရခြင်းသာ ဖြစ်ပါတယ် ။ 

       ရည်ရွယ်ချက်က ကိုယ့်လောက် အချိန်မပေးနိုင် ၊ မရှာဖွေနိုင်တဲ့သူတွေ ကိုယ်သိထားသလို အလွယ်တကူ သိကြနိုင်စေဖို့ နဲ့ တကယ့်ပညာရှင်များ တတ်သိသူများ ဖတ်မိပြီး မန့် တွေနဲ့ ဝင်ရောက် ဖြည့်စွက် ပညာပေးခြင်းဖြင့် အတော်အတန်ပြည့်စုံသော အသိတို့ ရနိုင်စေရန် ရည်ရွယ်ပါတယ် ။ 

           နိုင်ငံရေး စီးပွားရေး လူမှုရေး ဘာသာရေး အစရှိသဖြင့် ကဏ္ဍပေါင်းစုံက ကျွမ်းကြင်သူတွေအများစုသည် ကျနော်မနှစ်သက်တဲ့ စကားပုံနဲ့ အညီ နေစိမ့်နေကြတာလည်း အံ့သြစရာပါပဲ ။

  '' တိတ်တိတ်နေ ထောင်တန်၏''

  '' ပညာစည်တီးမှမြည်၏ ''

  '' နဲနဲပြော များများထောင် ''

         အစရှိတဲ့ စကားပုံတွေဟာ ပညာခေတ်မှာ စောက်ဖိုးမတန်တော့ပါဘူး ။ ပညာကို လက်ဆင့်ကမ်းဖို့ရာ အတွက် ဒူးထောက်တောင်းပန်မှ သင်ပေးမယ်ဆိုတဲ့ အပေါက်တွေ ဖြစ်နေပါတယ် ။ 

       အချို့ဆရာကြီးတွေ မျှဝေနေတာတွေ့ရပေမယ့် သာမန်လူတို့ နားလည်နိုင်စွမ်းမရှိတဲ့ အရေးအသားတွေကြောင့် ပျံ့နှံ့ခြင်းမရှိတာလည်း စိတ်မကောင်းစရာပါပဲ ။

       နောက်ပြီး ပညာရှင်အတော်များများသည် အကြောက်လွန်ဖြစ်နေကြပြီး '' ကြောက်တတ်ရန်ကင်း '' ဆိုတဲ့ အတ္တဗဟိုပြု စကားပုံနဲ့ ပြည်သူ့အကျိုးအတွက် ပြောသင့်တာ မပြောဝံ့ပဲ နှုတ်ဆိတ်နေကြတာလည်း စိတ်မကောင်းစရာပါပဲ ။ 

       ကျနော်တို့ နိုင်ငံရေးစိတ်ဝင်စားတာ ဆရာနေဝင်းမောင် (THE VOICE) နဲ့ ဆရာသန်းထွဋ်အောင် (Eleven) တို့ကြောင့်ဆိုရင် မမှားပါဘူး ။ ဆရာနေဝင်းမောင်ကနေ နောက်ဆုံးအချိန်ထိ သူ့ယုံကြည်ချက်ကို ဖြန့်ဝေရင်း ဆုံးပါးသွားခဲ့ပါပြီ ။ 

       နှမျှောစရာကောင်းတာက ဆရာသန်းထွဋ်အောင်ပါပဲ ။ NLD အာဏာရရေးအတွက် အားထုတ်ခဲ့တဲ့ အင်အားကြီးမီဒီယာဟာ NLD ကို အစောဆုံးပြန်ပြီး ဝေဖန်ခဲ့ကြတာလည်း မှတ်တမ်းတင်ရပါမယ် ။ ကိုကိုကြီးတို့ ၈ ပူးတွေ ဂျော့ဆိုးရော့ လက်ဝေခံလုပ်ပြီး ဘဏ္ဍာငွေ အပျောက်ရိုက် တိုင်းပြည်သစ္စာဖောက်ဖို့ ကြံနေတာကို ပထမဆုံး ရေးသားခဲ့တာလည်း Eleven ပါပဲ ။ 

       NLD အစိုးရ ဝန်ကြီးစာရင်း ကြေညာချိန်မှာ အစောဆုံး ဝေဖန်တာလည်း သူတို့ပါပဲ ။ နောက်ဆုံး ဖြိုးမင်းသိန်းနဲ့ မောင်ဝိတ်တို့ လက်ပေးလာဘ်ယူမှုကို (နာရီကိစ္စ) အစဖော်လို့ အရေးယူခံကြရပါရော ။ 

      ဒေါက်တာသန်းထွဋ်အောင်လည်း အဲဒီကိစ္စပြီးကတည်းက ပျောက်သွားလိုက်တာ ယနေ့ထိ စုံးစုံးမြှပ်ပါပဲ ။ ဦးသိန်းစိန်လက်ထက် အန္တရာယ်မရှိမှန်းသိလို့ လက်သံပြောင်သလောက် သူအားပေးခဲ့တဲ့ NLD လက်ထက်မှာ နဲနဲထိတာနဲ့ နောက်ဆုတ်ပြေးသွားတဲ့ ဒေါက်တာသန်းထွဋ်အောင်ဟာ တိုင်းပြည်နဲ့ပြည်သူကို ချစ်တာထက် သူ့ကိုယ်သူပိုချစ်တဲ့သူ သူရဲဘောကြောင်တဲ့သူအဖြစ် ကျနော့်ရင်ထဲက အထင်ကြီးလေးစားမှုတွေကို နှုတ်ယူသွားခဲ့တာ ကြာပါပြီ ။ 

        အမွေစား အမွေခံအဖြစ် ကိုဖြိုးဝေလို လူမျိုးကို ထားရစ်ခဲ့တာကတော့ ကျေးဇူးတင်ရမှာပါပဲ ။ ကျနော်စော်ကားလိုစိတ်နဲ့ ရေးနေတာမဟုတ်ပါဘူး ။ ပညာရှင်ပါဆိုတဲ့ ပုဂ္ဂိုလ်ကြီးတွေရဲ့ ကြောက်ရွံ့စိတ် ၊ အတ္တစိတ် တွေ ဖယ်ရှားပြီး တိုင်းပြည်အတွက် ပညာတွေ ဆရာစားမချန် ဝေမျှကြဖို့ ပြောချင်တာပါ ။

      ဒီနေရာမှာ အလုပ်မဖြစ်တဲ့ မျှဝေခြင်းကိုလည်း ရှုံ့ချရပါမယ် ။ တက္ကသိုလ်တွေမှာ သုတေသနဂျာနယ်တွေ ငွေကုန်ခံထုတ်လေ့ရှိပါတယ် ။ လူအများစု 98 % နားမလည်တဲ့ အင်္ဂလိပ်ဘာသာနဲ့ ထုတ်ကြတယ်ဗျ ။ ရေးထားတော့ ပြောင်းပင်ဘယ်လိုစိုက်ရတယ် မုံလာဥဘယ်လိုစိုက်ရတယ်ပေါ့ ။

        တွေးကြည့်လေ အဲဒီလို သုတေသနဂျာနယ်ထုတ်နေတဲ့ တက္ကသိုလ်ကြီးက စာအုပ်ဖတ်နေတဲ့ ဆရာတွေက လယ်စိုက်ကြမှာလားဗျ ။ တောသူတောင်သားနားလည်အောင် ဘာလို့ မြန်မာလိုမရေးကြတာလဲ ။ လူအထင်ကြီးပြီးရော လုပ်နေကြဟန်တူပါရဲ့ဗျာ ။

        အများစုသော ပညာရှင်ကြီးတွေဟာ သက်တမ်း ၇၀ ကျော် ၈၀ တွေ ဖြစ်နေကြပါပြီ ။ ရိုင်းတယ်မထင်ပါနဲ့ ရှေ့တိုးသေဖို့ ရှိကြတဲ့ အရွယ်တွေရောက်နေကြပါပြီ ။ 

       ဒီအရွယ်ကြီးတွေမှာ ဘာနှမျှောစရာ အနာဂါတ်ကျန်နေကြပါသလဲ... ?

       တိတ်တိတ်နေထောင်တန်ရင်း သေရွာကို ပညာတွေယူသွားကြတော့မှာလား...?

        လူ့သက်တမ်းကို အများကြီးတွက်ဆမျှော်ကိုးမနေကြပါနဲ့ဗျာ ။ ကျနော်တို့ ငယ်စဥ်ကလေးဘဝ မူလတန်းအရွယ်ကို မျက်စိမှတ်စဥ်းစားကြည့်ပါ ။ ဖျက်ကနဲ ပြန်ရောက်သွားလိမ့်မယ် ။ သြော် အချိန်တွေ အကုန်မြန်လိုက်တာလို့ သတိထားမိကြပါလိမ့်မယ် ။

       ဒီလိုပါပဲ ကျနော်တို့ လက်ကျန်သက်တမ်းဆိုတာကလည်း ဖျက်ကနဲ ကုန်သွားကြမှာပါပဲ ။

-  ဘာတွေ နှမျှောတသနေကြပါသလဲ ....?

- ဘာတွေ စိုးရိမ်ကြောင့်ကြနေကြပါသလဲ...?

        ပညာတွေကို ကိုယ့်ရင်ထဲထည့်ပြီး သေနေတဲ့ ပညာသေအစား ၊ ပညာတွေကို လူအများနားလည်အောင် စိတ်ဝင်စားအောင် ရေးသားဖြန့်ဝေကြရင်း သင်ကြားပေးရင်း နဲ့ ပညာရှင် အစစ်ဖြစ်အောင် ဘဝနေဝင်ချိန်ကို အကောင်းဆုံး အတောက်ပဆုံး ဆည်းဆာညနေအဖြစ် မြန်မာ့ပညာရှင်ကြီးများ ပုံဖော်သင့်နေပါပြီ ။ 

       ကိုရွှေမျိုးဝင်း

။       ။ ထင်တဲ့အတိုင်းပဲ မနေ့က တင်လိုက်တဲ့ စပိုင်နိုင်ငံတော် ပို့စ် ကြောင့် page မှာတင်နေတဲ့ အကောင့် တလ ပိတ်ပြန်ပြီ ဗျာ ကြံဖန်တင်ကြည်အုံးမယ် ။

(တချို့တိုက်ဆိုင်မှုတွေကြောင့် နာလိုခံခက် ဖြစ်သွားကြရင်လည်း Sorry ပါဗျာ.... )