ခေတ်သစ် မြန်မာ့နိုင်ငံရေးမှာ ပြည်သူတွေ ဇဝေဇဝါ ဖြစ်နေတဲ့ ပြဿနာကြီးတွေထဲက နှစ်ခုလောက်ကို သိသလောက် ပြောချင်လာပါတယ် ။
ပထမတခုက ဦးစောမောင်ဆီက အာဏာလုခဲ့ကြတာလား (သို့မဟုတ်) အမှန်တကယ် ကျန်းမာရေးအခြေအနေကြောင့် အနားပေးခဲ့ရတာလား ဆိုတဲ့ ပြဿနာပါပဲ ။
ဦးခင်ညွှန့်ရေးခဲ့တဲ့ စာအုပ်ထဲမှာ အမှနိတကယ် ကျန်းမာရေးချို့တဲ့လာတဲ့အတွက် အနားပေးရကြောင်း ရေးသားထားပါတယ် ။ အခြား သက်သေအဖြစ် ထပ်မံရှာဖွေကြည့်ရာမှ ဖော်ပြပါ link ထဲက အကြောင်း ထပ်တွေ့မိပါတယ် ။
https://www.facebook.com/101818795906282/posts/105539162200912/
အရေးကြီးတဲ့ အချက် ဦးစောမောင် ကျန်းမာရေးမကောင်းတော့တာမှန်ကန်ကြောင်း ၊ PSO ကိုတောင် အလာမခံတော့ပဲ ဒေါသတွေကြီးနေကြောင်း ၊ စိတ်ဖိဆီးမှုကြောင့် ၁၉၉၂ သင်္ကြန်အပြီး ရုံးမတက်တော့ကြောင်း ပြောကြားပါတယ် ။
အနားပေးလိုက်ပြီဆိုတဲ့ အမိန့်စာကို ဦးခင်ညွှန့်က သွားပေးကြောင်း နဲ့ စစ်ရုံးဝန်ထမ်းများကိုတော့ ဦးသန်းစိန်ကလာပြောကြောင်း ဖြေထားပါတယ် ။ ဖြေကြားသူဟာ ဦးစောမောင်နဲ့အတူ နောက်ဆုံး ၃ နှစ်ကာလ အတူအနီးကပ်နေခဲ့တဲ့ သားသမီးကဲ့သို့ဖြစ်နေတဲ့ ရဲဘော်မို့ လိမ်ညာစကားပြောမှာ မဟုတ်ပါဘူး ။
ဒါက ဒီနေ့ထိ ဇဝေဇဝါ ဖြစ်နေကြဆဲ ပဟေဠိတခုရဲ့ အဖြေပါပဲ ။
နောက်ထပ် ဇဝေဇဝါ ဖြစ်ခဲ့ကြရတာက ဦးခင်ညွှန့်ရဲ့ ထောက်လှမ်းရေးတပ်ဖွဲ့ကြီးကို ဖျက်သိမ်းခဲ့ရတဲ့အကြောင်းပါပဲ ။
ဒီပြဿနာရဲ့ အကြောင်းရင်းတွေကတော့ များစွာရှိကြမှာပါပဲ ။ ဒီထဲကမှ ကျနော်သိထားခဲ့ရတဲ့ အကြောင်းအချို့ကို တင်ပြချင်ပါတယ် ။ ဟုတ်မဟုတ်ဆိုတာကတော့ ကျနော့်မိတ်ဆွေအချို့ ပိုသိကြမှာပါပဲ ။
အများသိထားသလို လက်စောင်းထက်လှတဲ့ ထောက်လှမ်းရေးရဲ့ အာဏာ ပါဝါများဟာ အင်မတန်ကြီးမားခဲ့ပါတယ် ။ တပ်ဖွဲ့ဝင်အချို့ရဲ့ ဆက်ဆံရေးကြောင့် တပ်မတော်တပ်ရင်း တပ်ဖွဲ့အရာရှိတွေ မကျေမနပ်ဖြစ်လာကြပါတယ် ။
တပ်တွင်း ရာထူးနဲ့ မကိုက်ညီလောက်သော အလွန်အကျွံလုပ်ပိုင်ခွင့်များကြောင့် ထောက်လှမ်းရေးကို ကျန်တဲ့ တပ်ရင်းတပ်ဖွဲ့တွေ မျက်စေ့စပါးမွှေးစူးလာကြပါတယ် ။
ဒါက အရေးကြီးတဲ့ အကြောင်းတချက်ပါပဲ ။ နောက်ထပ်ဖြစ်ပွားရတဲ့ ပြဿနာက အကြီးအကဲ တပ်မှူးကြီးများရဲ့ ကိုယ်ကျိုးစီးပွားထိခိုက်စေမှုတွေ ဖြစ်လာပြီး အငြိုးအတေးတွေ ထားလာကြတာကလည်း အကြောင်းတခုပါပဲ ။
ထင်ရှားတဲ့ ဥပမာတခုကတော့ သူရရွှေမန်းနဲ့ ထောက်လှမ်းရေး ငြိခဲ့ကြတဲ့ အဖြစ်အပျက်ရှိပါတယ် ။ သူရရွှေမန်းဟာ ထိုအချိန်က တပ်မတော်ရဲ့ နံပတ် ၃ နေရာမှာ ရှိတာပါ ။
ချောင်းသာ ငွေဆောင်တို့မှာ အပမ်းဖြေကမ်းခြေတွေ ဖော်ဆောင်မယ်ဆိုတဲ့ စီမံကိန်းရေးဆွဲထားတုန်း ဦးရွှေမန်းရဲ့သား ကုမ္ပဏီက အဲဒီဒေသက မြေတွေ လက်ဝါးကြီးအုပ်ပါရော ။ သိမ်းတာတမျိုး အချိုအချောင်ဝယ်တာတမျိုးနေမှာပေါ့ ။ သတင်းက ကြိုရထားတာကိုး ။
တကယ်တည်ဆောက်ခါနီး အဲဒီဒေသရဲ့ မြေမှန်သမျှ သူရရွှေမန်းအုပ်စုက လက်ဝါးကြီးအုပ်ပြီးဖြစ်နေပါရော ။ ထောက်လှမ်းရေးက လျှင်တော့ ဒေသခံတွေနဲ့ ချိတ်ဆက်ပြီး ဒီလိုမတော်မတရားလုပ်ထားတာကို ဦးသန်းရွှေဆီ သတင်းပို့ကြတယ် ။
ဦးသန်းရွှေကတော့ ရှင်းတယ် ။ ဟေ့ကောင် အဲဒီမြေတွေ ပြန်ပေးလိုက် တိုင်းပြည်အတွက် အပမ်းဖြေကမ်းခြေလုပ်ရမှာလို့ ပြောလိုက်လို့ ပွဲပြီးသွားတယ် ။
သူရရွှေမန်းအုပ်စုရဲ့ စိတ်ထဲမှာတော့ ပါးစပ်ဝက ထမင်းလုပ်မဟုတ်ဖူးလည်ချောင်းထဲက ထမင်းလုတ်ကော်ထုတ်ခံရသလို ဦးခင်ညွှန့်နဲ့ သူ့တပ်ဖွဲ့ကို ရန်ငြိုးထားပါတယ် ။ ဒါကလည်း ကြီးမားတဲ့ အကြောင်းတရပ်ပါပဲ ။
နောက်ထပ် အရေးကြီးဆုံးနဲ့ လတ်တလောဖြစ်ခဲ့ရတဲ့ အကြောင်းအရင်းကလည်း စိတ်ဝင်စားစရာပါပဲ ။ ကံအားလျှော်စွာ ကျနော်သိခဲ့ရတာပါ။
ပြောပြသူက ထောက်လှမ်းရေးက တပ်ကြပ်ကြီး ကိုသန်းစိုးတဲ့ ။ အသားဖြူဖြူ ပိန်ပိန်နဲ့ သဘောကောင်းတဲ့ လူရိုးပါဗျာ ။ တပ်ကြပ်ကြီးဆိုပေမယ့် ထောက်လှမ်းရေးရုံးမှာပဲ နေရတဲ့သူဆိုတော့ အကြံအဖန်မရှိရှာပါဘူး ။
သူက ကွန်ပြူတာကိုင်ရပါတယ် ။ ဦးခင်ညွှန့်နဲ့ နိုင်ငံခြားသားတွေ စကားပြောရင် မြန်မာလိုပြောတာကို အင်္ဂလိပ်လို ၊ အင်္ဂလိပ်လိုပြောတာကို မြန်မာလို တောက်လျှောက်ဘာသာပြန် စာစီရတဲ့အထိ ကျွမ်းကြင်ပါသတဲ့ ။
ဗိုလ်မြနဲ့ ဦးခင်ညွှန့်တွေ့တော့လည်း ကိုသန်းစိုးပါသတဲ့ ။ ဒါတွေက သူပြောတဲ့အတိုင်းပါပဲ ။ ကျနော်က ဘာလို့ ထောက်လှမ်းရေးအဖျက်ခံရတာလည်းမေးကြည့်တော့ သူသိတာပြောပြပါတယ် ။
ခရိုနီကြီးတဦးက တိုင်းမှူးတယောက်နဲ့ ချိတ်ဆက်ပြီး ရွှေတွေကို မှောင်ခိုလုပ်ပါရော (ရွှေကို ပြည်ပရောင်းချခွင့် ပိတ်ပင်ထားပါတယ်) ။ အဲဒါကို ထောက်လှမ်းရေးရဲ့ အရံတပ်ဖွဲ့ နယ်စပ်လုံခြုံရေးတပ်က ဖမ်းပြီး ထောက်လှမ်းရေးကို သတင်းပို့ပါတယ် ။
ခရိုနီက လာဘ်ထိုးပြီး ပြဿနာကို ဖြေရှင်းပါတယ် ။ အဲဒီလာဘ်ငွေယူပြီး ရွှေလည်းဖမ်းတော့ တိုင်းမှူးနဲ့ ပြဿနာတက်ပါတယ် ။ တိုင်းမှူးက နယ်စပ်လုံခြုံရေးကို လာဘ်စားမှုနဲ့ တရားစွဲထောင်ချပါတယ် ။
ထောက်လှမ်းက မခံပဲ တိုင်းမှူးတွေရဲ့ နောက်ကြောင်းအကုန်ပြလိုက်ကြဆိုပြီး ခိုင်းပါတယ် ။
အဲဒီမှာပဲ တပ်တွင်းပြိုကွဲမှုဖြစ်နိုင်တယ်ဆိုပြီး တင်ပြကြရင်း ထောက်လှမ်းရေးကို ဖြိုခွဲဖို့ တပ်မှူးတွေ တိုက်တွန်းကြသတဲ့ ။ ဦးသန်းရွှေက ဦးခင်ညွှန့်ကို
'' ကိုခင်ညွှန့်ရေ ခင်ဗျာ ဝန်ကြီးချုပ်ရာထူးနဲ့ နိုင်ငံရေးကဏ္ဍ တာဝန်ယူပြီး ထောက်လှမ်းရေးကို တခြားလူ လွှဲပေးလိုက်ဗျာ ''
ဆိုပြီး ပြောပါတယ် ။ သူမရှိရင် သူ့တပည့်တွေကို ဦးရွှေမန်းလို ဂေါင်တွေက ကြိတ်မှာကို ဦးခင်ညွှန့်က ကောင်းကောင်းကြီးသိပါတယ် ။ ဒါကြောင့် တပည့်တွေကို သူရှိနေရင် ကာကွယ်နိုင်မှာပါဆိုပြီး တွက်ဆကာ ထောက်လှမ်းရေးအဖွဲ့ကို လွှဲမပေးခဲ့ပဲ အတူခုန်ဆင်းခဲ့တာပါ ။
ယခု ပြောပြတဲ့ အချက်တွေက ဦးခင်ညွှန်းရုံးက ကွန်ပြူတာတပ်ကြပ်ကြီး ပြောပြချက်များသာ ဖြစ်ပါတယ် ။ ရာခိုင်နှုံးဘယ်လောက်မှန် မမှန်ကတော့ အကြောင်းသိသူတွေပဲ ဆုံးဖြတ်ကြပါတော့ဗျာ ။
ဒါတွေကတော့ လူအများစု ဇဝေဇဝါဖြစ်နေဆဲ ပြဿနာကြီးအချို့ထဲက ကျနော်လေ့လာ တွေ့ကြုံခဲ့သမျှကို ပြန်လည်မျှဝေလိုက်ခြင်းပဲ ဖြစ်ပါတယ် ။
ကိုရွှေမျိုးဝင်း
No comments:
Post a Comment