ကျနော်တို့ငယ်ငယ်က အရူးတယောက် ရှိခဲ့ဖူးပါတယ် ။ အဲဒီ အရူးက တမျိုးဗျ ။ သူ့ကို ပိုက်ဆံတွေ ထုတ်ပြပြီး မင်းကြိုက်ရာယူလို့ ပြောလိုက် သူက တန်ဖိုး အသေးဆုံး တရွက်ပဲ ရွေးယူလေ့ရှိတယ် ။
နောက်ပြီး သူက စားချင်ရင် တောင်းမစားဘူး လုမစားဘူး ဝယ်စားတယ် ။ အဲ စျေးသည်တွေကလည်း အရူးလာဝယ်ရင် လာဘ်ကောင်းတယ်လို့ အယူအစွဲ ရှိတာလည်းပါ ၊ သနားတာလည်း ပါတော့ သူလာပြီး ဝယ်ပြီဆိုတာနဲ့ တထောင်တန်ဆို တရာလို့ ပြော ၊ ငါးရာတန်ဆို ငါးဆယ်လို့ ပြောပြီး ရောင်းကြတယ်ဗျ ။
အဲဒီ အရူးက မြို့အစွန်က ဇရပ်မှာပဲ နေလေ့ရှိတယ် ။ ကျနော်တို့လည်း တခြားက ဧည့်သည်လာလာရင် အပျင်းပြေ အရူးနဲ့တွေ့ ငွေတွေထုတ်ပြ သူက တန်ဖိုးအနည်းဆုံးပဲ ကောက်ယူသွားတာ ကြည့်ပြီး ရီကြမောကြ လုပ်နေကြပေါ့ဗျာ ။
ဒါပေမယ့် အဲဒီ အရူးကို ရပ်ကွက်ထဲက ကိုစပ်စု တယောက်က မယုံဘူးဗျ ။ အရူးက ငွေတွေ ရွေးယူပါဆိုရင် တန်ဖိုးအနည်းဆုံးကို ရွေးယူပေမယ့် သူဝယ်စားလို့ ငွေပေးရင် ၅၀၀/ ၁၀၀ဝမမှားဘူးလေ ။ ဒီတော့ ငွေတန်ကြေး သူသိတယ်ပေါ့ ။
ဒါနဲ့ ကိုစပ်စုတယောက် ညတိုင်း အရူးရှိရာ ဇရပ်ဆီ အလည်သွားပြီး ခင်အောင် ပေါင်းတာပေါ့ ။ လနဲ့ ချီကြာလာတော့ အရူးနဲ့ အရမ်းရင်းနှီးသွားပြီး သူသိချင်တာ မေးပါတယ် ။
အရူးက ပထမတော့ မပြောသေးဘူး ။ နောက် ခဏခဏ မေးလွန်းမကမေးနေတော့မှ ဘယ်သူ့မှ မပြောနဲ့ ဆိုပြီး ဒီလို ပြောသတဲ့
"ကဲ ခင်ဗျားက ကျုပ်ကို ငွေတွေပြတယ်ဗျာ တထောင်တန်ကနေ ၅၀ိ တန်အထိဆိုပါတော့"
"အေးဟုတ်ပြီလေ ပြနေကြပဲ"
"အဲဒါ ယူခိုင်းတော့ ကျုပ် တထောင်တန်ယူလိုက်ရင် ထူးဆန်းတော့မလား "
"ဘယ်ဆန်းမလဲ ကွ"
"အဲဒါဆို နောက်ထပ် ဘယ်သူက ကျုပ်ကို ထပ်ပေးအုံးမလဲ"
"ဘယ်ပေးမလဲ မင်းရလဲ တခါပေါ့"
"နောက်ပြီး စျေးသည်တွေကရော တထောင်တန်ကို တရာနဲ့ ရောင်းပေးပါ့မလား"
"ဘယ်ရောင်းမလဲကွ မင်းကို ငွေတန်ကြေးနားမလည်တဲ့ အရူးပဲဆိုပြီး သနားလို့ ရောင်းကြတာပေါ့"
"အဲဒါပဲလေ "
"ဟင် ဒါဆို မင်းက တကယ်မရူးဘူးပေါ့"
"ဘယ်သူတွေ ရူးနေလည်း စဥ်းစားပေါ့ "
ကိုင်းဗျာ ကိုစပ်စုကလည်း နှုတ်လုံ ကတိတည်ချက်ဗျာ အဲဒီအရူးသေမှ ပြန်ပြောတယ်ဗျ ။
ဗျာ ကျနော်လား ! ခဏခဏ ပါတာပေါ့ဗျာ နေရာတကာ ငံစပ်စပ်လုပ်နေကြကိုး ထိပ်ဆုံးက ခံခဲ့ရတာ ပေါ့ ဘယ်နေပါ့မလဲ ။
သြော် တမြို့လုံးကို လိမ်စားသွားတဲ့ အရူးကို စိတ်မတိုဘူးလား ဟုတ်စ !
စိတ်တိုတာပေါ့ဗျ ။ ဒါပေမယ့် အခုတော့ စိတ်မတိုတော့ ပါဘူးလေ ။ အင်းးး တရားရလို့ တရားကျသွားလို့ မဟုတ်ရပါဘူးဗျာ ။
ခင်ဗျားတို့ စဥ်းစားကြည့်လေ အခုဆိုရင် တနိုင်ငံလုံးကို လိမ်စားနေတဲ့ သူတွေ အစုလိုက်အပြုံလိုက် ကောင်းစားနေမှပဲ ဟာ ။ အဲဒီအရူးက စားရရုံလေး လိမ်ခဲ့ရရှာတာပါ ။ အခု လူလိမ်အရူးတွေကတော့ 😁😁😁😁😁
ကိုရွှေမျိုးဝင်း
(NLD လက်ထက်က ရေးခဲ့တာလေး သူများပြန်တင်လာတာ တွေ့လို့ပါ)
No comments:
Post a Comment